Heilbrigt Samfélag

Framboðið Betri sveit hefur frá upphafi lagt áherslu á að ræða málin af yfirvegun og ábyrgð. Við gerðum okkur grein fyrir því að þegar við myndum benda á það óréttlæti sem þeir íbúar hafa orðið fyrir sem eru skráðir ótilgreindir í húsum, gæti það kallað fram gagnrýni – jafnvel persónulegar árásir á frambjóðendur okkar. Við vorum undir það búin.
Það sem við vorum hins vegar ekki undirbúin fyrir er það umfang og sá tónn sem nú birtist í umræðunni – fálmkennt skítkast og ásakanir sem koma úr sveitarfélaginu. Slík framganga þjónar hvorki málefninu né samfélaginu sem við öll erum hluti af.
Markmið Betri sveitar er einfalt og skýrt: að benda á kerfisbundið misrétti sem hefur viðgengist og hefur bitnað á ákveðnum hópi íbúa, og kalla eftir sanngirni, jafnræði og mannlegri reisn fyrir alla. Við höfum ekki ráðist að neinum persónulega; við höfum gagnrýnt verklag og ákvarðanir sem hafa haft raunveruleg áhrif á líf fólks.
Við viljum að í sveitinni ríki sátt og samlyndi. Við viljum samfélag þar sem allir íbúar sitja við sama borð, njóta sömu réttinda og eru metnir að verðleikum – óháð stöðu, tengslum eða búsetuskráningu.Er það of mikið að fara fram á? Okkar mat er að það sé lágmarks krafa í hverju réttlátu og heilbrigðu samfélagi.